أمين الفتوى: مفيش حاجة اسمها أعمل اللى أنا عايزه وبعد كده أطلع أحج وربنا يغفر لى.. ده اسمها تحدى لله

قال الدكتور أحمد وسام، أمين الفتوى بدار الإفتاء المصرية: «لو عاوز ذنبوك كلها تغفر لازم ترد مظالم الناس وتتوب وتستغفر، وتتحلل نهائيا من الحرام، مفيش حاجة اسمها أعمل اللى أنا عايزه وبعد كده أطلع أحج، ربنا يغفر لى، لأ ده اسمها تحدى لله، لازم تقبل على الله بنفس معترفة بالمعصية وعدم ارتكابها مرة أخرى».

وتابع خلال حلقة برنامج «فتاوى الناس»، على فضائية «الناس»، اليوم الأربعاء إن الهدف من الحج هو الرجوع بلا ذنوب، مستشهدا بالحديث النبوى الشريف، فيما قاله سيدنا النبي محمد صلى الله عليه وسلم: «منْ حجَّ فَلَم يرْفُثْ، وَلَم يفْسُقْ، رجَع كَيَومِ ولَدتْهُ أُمُّهُ».

وأضاف: «طيب يبقى لازم قبل ما نحج نتهيأ لهذه المغفرة بتنقية أنفسنا من الحرام، لأن ربنا لا يقبل إلا طيب، فلازم يكون كل أمرك وأموالك وأكلك طيب وملبسك طيب، لازم كل أمورك تكون حلال، وترد حقوق العباد»، مستشهدًا بقول الله سبحانه وتعالى: «كُلُوا مِنْ طَيِّبَاتِ مَا رَزَقْنَاكُمْ وَاشْكُرُوا لِلَّه».