ياسمين عز: مش لازم تسألي هتاكل إيه 15 مرة ما هو بياكل المحروق والمعجن وبيكتم في قلبه

حرصت الإعلامية ياسمين عز علي توجيه عدة رسائل ونصائح للسيدات في كيفية التعامل مع الزوج في شهر رمضان الكريم.

وقالت ياسمين عز، عبر تقديم برنامج “كلام الناس” الذي يعرض عبر قناة “إم بي سي مصر”: «أولًا بلاش السؤال اليومي المعتاد بتاع أعملك إيه على الفطار، اعملي أي حاجة، وعيب عليكي بعد كل السنين والعشرة دي، إنك مش عارفة هو بيحب ياكل إيه ومبيحبش إيه».

وتابعت ياسمين عز: «المشكلة إنك بتسألي السؤال 15 مرة كل يوم، وانتوا بتتسحروا بتسأليه هتاكل على الفطار، والصبح أول ما يصحى نفس السؤال، ولما يروح الشغل تتصلي بيه عشان نفس السؤال، لدرجة إن وهو بيفطر تسأليه هتفطر إيه بكره إيه على الفطار، زهق ومل، خلي بكرة لبكرة».

واضافت الإعلامية ياسمين عز: «هو إنتي عمرك عملتي أكل، والراجل اعترض عليه، بيبقى الأكل محروق وناقص ملح ورزك معجن وبياكل، وبيكتم في قلبه، وياكل ويقولك تسلم إيديك، بلاش السؤال ده وخاصة أول أسبوع في رمضان».