خالد الجندي: مفيش حديث ولا آية بتقول يلا نعيد عيد الحب

قال الشيخ خالد الجندي، عضو المجلس الأعلى للشئون الإسلامية، مثلا يقولك عيد الحب، أيوة مفيش حديث ولا آية بتقول يلا نعيد عيد الحب، ولكن نفتكر في يوم قيمة المحبة بين الناس، ومش المحبة اللي في دماغ بعض المهاويس والمراهقين، واحنا لم نبتكر شعيرة دينية في هذه المناسبة.

وأوضح خلال برنامج لعلهم يفقهون، المذاع على قناة dmc، اليوم الأربعاء، أن الإسلام يحث على فضائل الأعمال ويأمر بتذكرها ويجب الانتباه لها، مضيفا: لما نشجع أي محاولة لإقامة شعيرة أخلاقية يبقى أهلا وسهلا ويقولك مثلا عيد الأم، أيوة معندناش في الإسلام حاجة اسمها عيد الأم، ولكن عيد بمعنى يوم نتذكر ونفتكر فيه وايه المانع؟

خالد الجندي: الذي يحتفل يوماً واحداً بعيد الحب إنسان مقصر

وواصل: بعض الناس دماغهم شمال، فلما تقولهم عيد الحب يقولك يعني أنت بتشجع على الزنى والدعارة، وبتشجع على البدع، لكن يأخوانا لم نقل يلا نصوم أو نصلي في عيد الحب أو عمرة عيد الحب، لكن بنقول افتكروا قيمة المحبة، الناس اللي دماغها شمال، حالتها يوم القيامة هتبقى من أهل الشمال.

واستكمل: احنا مش بنقول حاجة دينية في عيد الحب، احنا بنقول تفكروا قيمة المحبة وعيد الحب بين الشخص وبين أبوه وصديقه وأهله، مضيفا: الرسول أمرنا بنشر المحبة وربنا بيقول في كتابه العزيز: وتعاونوا على البر والتقوى ولا تعاونوا على الإثم والعدوان.