“العربية اتقلبت بيا أنا و عائلتي بعد الصيانة بيوم “.. عميل يكشف عن مساوئ سيارة شيرى تيجو من غبور أوتو

سرد أحد رواد مواقع التواصل الاجتماعي، عن تجربته الشخصية مع سيارة تيجو من غبور أوتو، وذلك عبر موقع التواصل الاجتماعي فيس بوك.

وقال عبر تطبيق الفيس بوك: “حكايتى باختصار اشتريت عربية شيرى تيجو من غبور (الوكيل نفسه) فى مايو 2021 وطبعا ده بعد متابعة المراجعات عن العربية على يوتيوب و على جروبات الفيسبوك الخاصة بالعربية و انها قيمة مقابل سعر “.

إدارة فاشلة.. عميل يحذر من التعامل بفيزا مشتريات بنك مصر

وتابع : “كعادتى بحافظ و التزم جدا بمواعيد الصيانة الدورية فى التوكيل و بعد ما مشيت بالعربية ما يقرب من 25 ألف كيلومتر و فى يوم السبت 24 سبتمبر 2022 حضرت للتوكيل فرع طنطا و طلبت منهم عمل صيانة ال 25 ألف كيلومتر و كان رد مهندس الاستقبال هناك إن مفيش لزوم للصيانة طالما انت مغير زيت بيمشى 10 آلاف كيلومتر فى الصيانة عند ال 20 ألف كيلومتر”.

وأكمل :” ولكن أصريت على التشييك على العفشة خصوصا انى حاسس بمشكلة فيها و يظبطوا زوايا وخصوصا إنى كنت هسافر الغردقة تانى يوم فى رحلة مع أولادى و المهندس قال لى مفيش مشكلة الموضوع هياخد ساعة تقريباً عشان النهاردة السبت والدنيا زحمة.. ولكن الصيانة دخلت فى 7 ساعات كاملة و كنت مستغرب و بسأل كل شوية إيه المشكلة و مع اصرارى انى أفهم سبب التأخير، المهندس فهمنى إن العربية فيها مشكلة فى الميزان و لازم يتغير فيها قطعة غيار و طلبوا من الشركة تغيرها (لأن العربية لسه زيرو و فى الضمان) و الشركة بتماطل و فى الاخر سلمونى العربية وقالوا انهم غيروا القطعة اللى فيها مشكلة و استلمت العربية و مشيت الساعة 5 مساءا “.

وواصل : “فى فجر اليوم التالى (الاحد 25 سبتمبر 2022)، سافرت مع ولادى فى طريقنا الى الغردقة و طبعاً عشان معايا أطفال عملت ريست مرتين و كمان ماشى على مهلى 80 او 90 كم / س بالكتير.. وقبل الغردقة ب 40 كيلو لقيت العربية مش بتستجيب للتوجيه بالدريكسيون لحد ما خبطت فى بلادورة الطريق بالجنب و الغريب إن العربية اتقلبت 3 مرات بعد ما العجلة الأمامية يمين خرجت من العربية بالمساعد بتاعها كامل و معاه الكوبلن.. و بفضل الله ربنا نجانى أنا و زوجتى و أطفالى الثلاثة من موت محقق بمعجزة و اتنقلنا كلنا لمستشفى الغردقة و ما زلنا إلى اليوم تحت العلاج “.

واضاف :” الأغرب إن التوكيل اتصلوا بيا تانى يوم عشان متابعة الصيانة و بلغتهم إن العربية اتقلبت بسبب الصيانة و بلغونى إنهم هيجولى و يعملوا اللازم و يتحملوا كل شىء ولكن محدش عبرنى و لا قالوا لى انت فين لحد النهاردة.. دى صور العربية اللى دفعت فيها شقى عمرى كله”.

اللي بيكشفوا الممرضات مش الدكاترة.. مواطن يفتح النار على مستشفى دار اليسر

واختتم حديثه: “.وطبعا معايا كل التقارير الطبية لحالتى ( كسر فى الشظية و كسر فى عظام الحوض شمال ويمين و شرخ فى الكوع و انزلاق فى فقرات الرقبة و فقرات الظهر) وحالة زوجتى ( نزيف داخلى على شبكية العين و شروخ فى القفص الصدري و كدمات) و أولادى ( كدمات و سحجات ) غير الأذى النفسى للأولاد بسبب الحادثة الكارثية و كمان الأذى المادى بسبب غيابى عن عملى لفترة طويلة”.