شخص يشكو من شركة Uber : ” السواق كنسل الرحلة و عملي بلوك ..وخدمة العملاء مش بترد”

تقدم شخص بشكوي من شركة Uber الخاصة بالنقل ، مشيرة إلي أن تعامل السائقين غير لائق الي جانب أن خدمة العملاء الخاصة بهم غير مهتمة بالعميل.

حيث كتب عبر موقع التواصل الاجتماعي فيس بوك ،قائلة :” ما أنصحش حد خالص يستخدم Uber bus .. الموضوع زاد أوي وبوخ أوي أوي وبقى فيه تصميم على الأستهانة عيني عينك بالعملاء .. حجزت رحلة أوبر باص من التجمع للشروق .. وللي مايعرفش هو الرحلات في أوبر باص ممكن عادي تتلغي بدون ما يقولولك ولا أي اعتذار منهم وخطتك تبوظ ، تطمن بس قبلها بربع ساعة لو الرحلة ماتلغتش “.

وتابع:” المهم قبلها بربع ساعة جالي تأكيد الرحلة ورقم السواق فعلا .. كلمته سألني الوجهة فين قلتله الشروق قعد يتحايل عليا الغيها عشان هو رايح المنيب ومروح ووالنبي وعشان خاطري .. ماهو أنا كمان مروح بيتنا والله بعد يوم شغل مش رايح كوكي بارك ..قلتله اللي اقدر اعمله اني هستنى في الشمس لحد معاد الرحلة الجاية عشان حضرتك تروح بس مش هلغيها من عندي عشان هدفع فلوس والبرومو كود هيروح .. قعد يكدب ويقوللي اني مش هدفع حاجة (طبعا عشان مش عاوز يلغيها من عنده ويأثر على rate بتاعه) .. وفي الاخر بعد مناهدة ووجع قلب قال ماشي هيلغيها “.

وواصل: فضل ربع ساعة او تلت ساعة لاطعني في الشمس وماشي بعربيته من غير ما يكانسل وانا واقف مش عارف اطلب رحلة غيرها .. وعملي بلوك كل ما أكلمه مشغول ..بعد ما لغاها كان جه معاد الرحلة اللي بعدها بعد تلت ساعة ،طلبتها حصل نفس القصة بالظبط مع اضافة ان السواق كان متربي ومحترم في نص المكالمة قفل في وشي وبطل يرد على التليفون وقعد يلف بالعربية حوليا في التجمع ويقف في الشارع (لاحظ صورة رقم ٥ و ٦ و الساعة فوق على الشمال كام والرحلة أصلا معادها كام) من غير ما يكانسل الرحلة عشان انا ازهق واكانسلها “.

واضاف :”بس انا قلت يانا يا هو خليني واقف في الشمس بس مش هسيبه .. وفين وفين بعد نص ساعة كانسل الرحلة لما يأس .. وطلبت رحلة تالتة وجالي سواق محترم جدا وصلني .. بعد ما كنت وقفت في الشارع ساعة وخمس دقايق “.

واختتم حديثه: شوية ملاحظات مهمة توضح قد ايه اوبر شركة فاشلة :

١- مفيش اوبشن اسمه انك توصل لخدمة العملاء ويردوا عليك سواء تليفون او حتى شات .. لازم تدخل على help وتقعد تختار من مجموعة قوالب جاهزة اقرب حاجة لمشكلتك .. وهم هيبقوا يردوا عليك بعد يومين

سويفل وكريم عندهم اوبشن الشات والرد الوقتي عليك وجربت الاتنين قبل كدة ردوا عليا في دقايق بحل المشكلة .. الموضوع مش كيميا يعني

٢- الاتنين السواقين المحترمين تقييمهم واحد ٤.٩ وواحد ٥ .. ده وهم بلطجية كدة ..ده معناه ان تقييم اوبر ده بلح والسواقين عرفوا ازاي يعكوا ويبوظوا الدنيا ويتحايلوا على النظام عشان يفضل تقييمهم عالي ..النتيجة محدش يثق في تقييم السواقين على اوبر يا جماعة

٣- بجملة الهبل .. اوبر عاملين رقم السواق مينفعش تتصل بيه الا برقمك اللي متسجل على الابليكيشن .. فلو جيت تجرب برقم تاني عشان السواق مبيردش على رقمك هتلاقي رسالة مسجلة انك لازم تستخدم الرقم المسجل في اوبر ..يعني من الاخر اوبر قررت تحمي السواقين وتساعدهم يستهبلوا وانت اشرب من البحر

٤- عملت شكوتين تلاتة بالعافية وانا واقف في الشارع اوبر ردوا على واحدة منهم تاني يوم .. بعتولي ايميل ب رصيد ٥٠ جنيه !! ..يعني ولا مهتمين فعلا يصلحوا النظام والمشكلة ما تتكررش تاني .. ولا يعرفوا مين السواق عشان يعاقبوه ولا اي حاجة .. رديت عليهم قلتلهم مش عاوزهم لأني مش هستخدم الابليكيشن تاني

٥- الشئ الكوميدي والجدير بالدراسة اني بعد ما فاض بيا من تصرف كل سواق منهم كدة بعتله رسالة “حسبي الله ونعم الوكيل فيك” .. الاتنين اول ما جاتلهم الرسالة دي كنسلوا الرحلة ، يعني هم ضلالية وبيعذبوا الناس ويتعبوهم لكن من ناحية تانية بيخافوا ربنا !! هم متخيلين كدة يعني!! ..انا مش بتخيل غير ان موقف زي ده يحصل مع مراتي او أختي وهي واقفة في الشارع لوحدها ..ربنا يجازيهم وحسبي الله ونعم الوكيل فيهم تاني وتالت