ميكس بين البكاء والفرح.. مي عمر: “إش إش” فركش

كتب: زياد محمد

أعلنت الفنانة مي عمر، انتهاء تصوير مسلسلها الرمضاني الجديد “إش إش”، كما وجهت رسالة خاصه لزوجها محمد سامي مخرج العمل.

طاقم عمل مسلسل “إش إش”

ونشرت مي عمر فيديو لها رفقة طاقم عمل مسلسل “إش إش”، عبر حسابها الرسمي بموقع الصور والفيديوهات “انستجرام”، قائلة: الحمد لله رب العالمين فركش مسلسل إش إش، حقيقي مش قادرة أوصف إحساسي وأنا بودّع الشخصية اللي عشت معاها رحلة فيها كل حاجة من ضحك وبكاء وقلق وفرح.

وتابعت: حبيت كل لحظة قضيتها وأنا بجسدها، وحاسة إن جزء مني هيفضل معاها دايماً، وهيوحشني كل تفصيلة فيها بجد، شكراً من قلبي لكل حد شاركني الرحلة دي، من الممثلين اللي كانوا أحلى عيلة و أحلى صحاب بجد، كنا عيلة واحدة، نضحك سوا، نتعب سوا، وندعم بعض طول الوقت. شكرًا لكل واحد فيكم، على كل لحظة ضحكنا فيها، وكل موقف وقفنا فيه جنب بعض، وجودكم خلّى التجربة دي ممتعة، وخلاني أحس إني فعلاً محظوظة بالشغل مع ناس زيكم.

الذكريات الحلوة

واستكملت: مش هنسى الذكريات الحلوة دي أبداً، وهيوحشني كل حد فيكم. شكرا لكل فرد من فريق العمل اللي اشتغل بإخلاص عشان يطلع العمل ده بأحسن شكل. فريق العمل في إش إش كان سر نجاح كواليس التجربة ديه، كل حد في الفريق، من أول التقنيين لحد الإنتاج، كان بيشتغل من قلبه عشان يطلع العمل بأحسن شكل. بجد، ما حسيتش إني لوحدي لحظة، كلنا كنا إيد واحدة ودايمًا بنسند بعض.

وأردفت: شكر كبير لكل واحد فيكم، على تعبكم وإخلاصكم وعلى كل لحظة قدمتوا فيها دعمكم وحبكم محمد سامي ، شكرًا ليك على صبرك وعلى نظرتك اللي كانت دايمًا بتشوف التفاصيل اللي ما حدش غيرك كان ممكن يلاحظها، شكرا إنك بتعرف إزاي تخرج مننا أفضل ما عندنا و علي إبداعك و توجيهك في كل مشهد/ شكرًا إنك كنت قائد حقيقي لينا وخلّيت إش إش يبقى تجربة ما تتنسيش مستنية بفارغ الصبر.

واختتمت: تشوفوا إش إش وأتمنى توصل ليكم مشاعرنا بنفس القوة اللي حسيناها، شكراً لكل واحد كان جزء من الحلم ده، و بوعد الجمهور إن شاء الله هيتفرجوا علي مسلسل متعوب علي كل شوط فيه ، مسلسل إش إش بإذن الله هيكون مسلسل بيحترم ذوق الجمهور.