يسرا عن اعتزال عادل إمام: حتة من قلبي اتخلعت.. و أنا ولبلبة دايمًا بنروح نزوره

أعربت الفنانة يسرا، عن حزنها الشديد لاعتزال الزعيم عادل إمام للفن وذلك بعد تكريمه فى المملكة العربية السعودية.

وقالت الفنانة يسرا في تصريحات إذاعية لها: متصورتش في يوم إن عادل إمام أستاذنا الكبير يعتزل لأنه عاش للفن وعمري ما تصورت إنه يبعد عننا، تصورت يومها أنه معقول مش هيرجع لينا تاني بفنه؟ حتة من قلبي اتخلعت، وعلى فكره حقه إنه يعوز يرتاح بس أنا مش شايفاه بعيد ولا هيبعد عني أو عن جمهوره.

وتابعت يسرا: عادل إمام عاش علشان حب الجمهور ده، والتكريم اتعمل له بصورة حلوة جدًا، وكلنا تأثرنا، وعمري ما حسيت إني زعيم جمب الزعيم، اتعلم منه الزعامة ممكن، وعمري ما فكرت إني أكون زعيمة الفن.

وأكملت: عمري ما هنسى لما أستاذ عصام إمام قالي من 20 سنة، هعملك مسرحية وهسميكي الزعيمة، قولتله لأ مفيش زعيم غير أستاذ عادل، فأنا برضوا صعب أي حد يقارن نفسه بـ عادل إمام.

واضافت يسرا: أنا ولبلبة دايمًا بنروح نشوف عادل إمام، وأنا بفرح بقاعدتي معاه وبنقعد نتكلم على كل الشغل وبيضحك ويهزر ولذيذ وقاعدته دمها خفيف، هو راجل رائع بمعنى الكلمة.