بسبب عملية التجميل.. ريهام سعيد: بقالي 10 شهور بلبس نضارات فاضية ولو ملقتش نضارة في شنطتي بعيط

كشفت الإعلامية ريهام سعيد عن كواليس وتفاصيل فشل عملية التجميل التى أجراتها مع طبيب لبناني شهير، وذلك خلال تقديمها برنامج هي وصبايا على قناة هي.

وظهرت ريهام سعيد، على الشاشة بدون مكياج، قائلة: أنا منقطعة عن ناس كتير أوي، ولازم أحط 13 كيلو ميكاج عشان أنزل، وفي الاستوديو بنحط حاجة تدعم الوش ودي بفلوس كتير والقنوات بتأجرها ليّ.

وتابعت ريهام سعيد: حلمي التمثيل، ولو حد عاوزني في عمل هيقوله دي اتشوهت، كان في لحظات وحشة اوي، آخر مرة روحت للدكتور عملي فيلر عشان في حفرة جامدة عندي، بس أنا هدوب الفلير وهتعرض على الطب الشرعي، و فيه ناس كتير بتقول تستاهل عشان بتغير خلقة ربنا.

واوضحت ريهام سعيد انا قررت إجراء عملية التجميل لأن بعد ما خسيت وشي ترهل، أنا مكنتش هقول إني اتشوهت، مش حلو إن جمهوري يعرف أني اتشوهت، كنت بطلة على الهوا لابسة نضارة فاضية عشان تداري الحفر اللي في وشي.

وأكملت: بقالي 10 شهور بلبس نضارات فاضية، ولو ملقتش نضارة في شنطتي بعيط.. هروح أرمي كل النضارات دي خلاص، مهو حمل وانزاح، الكل هيتأقلم على وجهي الجديد، بالإضافة إلى تأقلمي على الوضع الجديد، وبشكر كل واحد بيدمرني نفسيًا أكتر.

واستطردت: مكنتش قادرة أطلع هوا النهارده، بس طلعت احترامًا ليكم عشان قولتلكم هطلع لجمهوري عشان محدش يقلق عليّ، هرفع قضايا في مصر والعراق الإمارات، وستتضمن تشهير وسب وقذف وخروج عن المعايير الطبية.

وواصلت: طول ما أنا حية أرزق، سأظل باحثة عن حقي وسأسترجعه، و أنا ست لوحدي مليش حد خالص، بس أنا هاخد حقي، كل ما بيتغلط فبيكون في ميزان حساناتي، عمليات التجميل مش حاجة وحشة، وشنا رأس مالنا، بالبلدي أكل عيشنا بنعتمد عليه في كل حاجة، مينفعش ممثلة أو مذيعة مش حلوة أو باينة أنها كبيرة في السن، لأن انتم كمان مبترحموش.

واضافت ريهام سعيد: أنا مش هصلح اللي حصل فيّ إلا لما اتعرض على الطب الشرعي، وأنا عندي ثقة رهيبة في القضاء وربنا.