بيحطوا حديد في الدهب.. سيدة تكشف عن طرق نصب جديدة لمحلات الذهب |صور

كشفت سيدة تدعى هويدا يوسف عن تعرضها للنصب في أحدي محلات الدهب، وذلك عبر صفحتها الرسمية على موقع التواصل الاجتماعي فيس بوك.

حيث قالت هويدا يوسف: ” طريقة جديدة لاخذ حق مش من حقهم مش هقول ( نصب).. عندي اسورة دهب و لبستها مرتين و اتقطمت فركنتها و نستها و بعد فترة رحت للجواهرجي في مول بوينت 90 و قالي لازم تسبيها نشوف ينفع تتصلح ولا لأ و بعد ثلاث اسابيع كلمني امبارح و قالي مش هتنفع و لازم حضرتك تيجي تختاري حاجة تانية او تبيعيها دهب مستعمل قولتله حاضر”.

وتابعت هويدا يوسف:” بالفعل روحت النهارده اتفرجت علي المعروض معجبنيش حاجة قولتله خلاص هبيعها فقالي اخر كلام علشان هنكسرها، قولتله مش انت قولت مش هتنفع تتصلح، قالي اه قولتله خلاص اكسرها لقيته بيقولي أصل جواها حديد لازم نشيله علشان نوزنها قولتله ايه ازاي هي 17.39 جرام و تتباع بنفس الوزن، قالي لا يا فندم هيه جواها حديد حوالي 5 جرام و شوية”.

واضافت هويدا يوسف: ” فقولتله إزاي تبعلي جرامات دهب و أكتشف أنها حديد كان لازم تقولي قبل ما اشتري قالي السوق كله كده فقولتله أنا مالي أنا اشتريت دهب و هبيع نفس الجرامات دهب، و أنا أفهم أن المفصل يبقي فيه سوسته اوكيه إنما الجزء اللي بيقفل ليه يبقي جواه حديد قالي هو كده، و ( يا فندم انا بشتري دهب مش حديد)، فقولتله انت بعتلي الحديد علي أنه دهب و دلوقتي بتقولي أنا بشتري دهب مش حديد”.

واختتم حديثها: ” علي العموم مش مهم الفلوس و هتبقي مادة حلوة جدا علشان الناس تعرف طريقة الغش الجديدة فقالي خلاص نخصم 2 جرام فقولتله ولا جرام و هخدها كده و اوعي الناس أفيد”.