مواطن يحذر من CIB: ” سحبوا مني 50 ألف جنيه تحويلات للخارج بالدرهم الإماراتي .. وأنا نايم”

حذر أحد رواد مواقع التواصل الاجتماعي، من التعامل مع بنك التجاري الدولي CIB، مؤكدا أنه تم سحب مبلغ مالي قدره 50 ألف جنيها من حسابه دون علمه .

وقال عبر موقع التواصل الاجتماعي فيس بوك: “أنا اتسرق مني خمسين ألف جنيه من الكريدت كارد بتاعك بنك CIB Egypt و أنا نايم و الكريدت كارد في المحفظة معايا عادي”.

وتابع: “الكلام دا حصل امبارح الساعة ٦ الصبح زي ما الرسايل موضحة كده (العملة دي هي الدرهم الإماراتي، الكارت بتاعي بالجنيه المصري عادي).. مخدتش بالي من اللي حصل غير امبارح بالليل و أنا بفتح الأبلكيشن بالصدفة و لقيت إن رصيد الكارت صفر .. طبعا بعد ما كلمت البنك عرفت ان الرصيد مش صفر ولا حاجة، الرصيد سالب تلاتين ألف ، برضو زي ما باين في الرسايل اللي مشفتهاش غير بعد ما كلمت البنك”.

وأكمل: “طبعا كلمت البنك بالليل و وقفوا الكارت و قالولي هنتكلم مع ماستر كارد و نشوف المشكلة هتتحل ولا لا، و مدونيش أي كلام مفيد إذا كانت الفلوس دي هترجع ولا لا، و قالولي البروسيس مع ماستر كارد بتاخد من ستين لتسعين يوم”.

واوضح :”طبعا برضو متبعتليش أي رسالة فيها وان تايم باسوورد أثناء المعاملات دي و دا غريب جدا، و حتى لو اتبعت لي فأنا كنت نايم و أنا عندي شك كبير في قدرتي إني أبعت الباسوورد لحد في الحلم”.

وواصل : “مبهر طبعا كمان إن السحب بالدرهم الإماراتي .. يعني انتو مقفلين التحويلات للخارج على الدنيا كلها و فاتحينها بالقطارة و جايين على قرمط تسمحوله يتسرق في خمسين ألف جنيه تحويلات للخارج ؟”

واضاف: “أنا كاتب البوست دا لسببين .. السبب الأول إني أحذر أي حد عنده حسابات في CIB ياخد باله لإنه باينله بنك مخروم ميعرفش حاجة عن السكيوريتي.. و تاني سبب إني عايز حل سريع ميخلينيش أستنى ٣ شهور كاملين عشان أدفع تمن إن البنك مهزق و مخروم، لا يا شباب حلو لي مشكلتي أنا الأول و بعدين اتصرفوا انتو مع ماستر كارد و خدوا ٣ سنين براحتكو ربنا يوفقكوا.”