“اترفدت ظلم وبيهددوني”.. موظفة بشركة فودافون تكشف عن تعرضها للظلم داخل المؤسسة

كشفت فتاة تدعي ميرهان محمد، موظفة بشركة فودافون عن تعرضها للظلم داخل المؤسسة، وذلك عبر موقع التواصل الاجتماعي فيس بوك.

وقالت ميرهان محمد: “بعد ما كنت برشح فودافون لأي حد اعرفه وبعد م كنت بجيب حق فودافون من العميل لما كان بيتصل وهو متضايق من الشركة واغير وجهة نظره عن الشركة واد ايه فودافون بتعمل المستحيل علشان تقدملك الخدمة ع اكمل وجه واخلي العميل يقفل راضي ومبسوط من فودافون.. فودافون هي اللي ضيعت حقي وظلمتني “.

فودافون بقت من ازبل الشركات بسبب الادارة

وتابعت :”بعد ما كانت احسن الشركات بالنسبالي بقت من ازبل الشركات بسبب الإدارة اللي فيها.. فودافون كاتبة ع الشباك ف المبنى بتاعها ف المعادي it’s not okay to make mistakes وشاطبة ع not يعني it’s okay to make mistakes يعني مفيش مشكلة انك تغلط بس تتعلم من غلطك عادي”.

وواصلت : “اشتغلت 3 سنين ف فودافون من 2019 واتنقلت م بين agent و technical و team leader و quality وكنت بسبورت ف حاجات كتير واخر حاجة وصلتلها ان أسهل حاجة ف كله دا اني اخد مكالمات وارد ع العملا واساعد ع الاقل ٦٠ عميل ف اليوم مثلا اني احللهم مشكلتهم وكفاية عليا الدعوات اللي بيدعوهالي لما اساعدهم يعني”.

واكملت: “واخترت اني اكمل agent واخد مكالمات وطول ال 3 سنين كنت بتقي ربنا ف شغلي وكل اللي اتعامل معايا عارف كدة وعارف اد ايه انا شخص مجتهد واد ايه بساعد اي حد محتاج اي حاجة سواء ف الشغل أو برا الشغل وعمري م قصرت ف حاجة ودا ال history بتاعي ف فودافون بشهادة اي حد طول فترة شغلي”.

اتحولت للتحقيق وسافرت من بني سويف للمعادي

واوضحت: “من شهرين كنت بشتغل وفجأة الساعة 3 العصر اتبعتلي ميل اني بكرة عندي investigation “تحقيق” الساعة 1 وانا اصلا من بني سويف والتحقيق ف زهراء المعادي يعني سفر والمفروض اي حاجة زي كدة بنتبلغ قبلها بيومين تلاتة علي الاقل كلمت ال HR عندنا اني ازاي اتبلغ قبلها بأقل من 24 ساعة والمفروض ان دا سفر قالي معلش روحي وهيكون امر روتيني لأننا عارفين شغلك واكيد فيه mistake،حصل ولأني عارفة فعلا ان انا مش عاملة حاجة اخاف منها ف مش هروح مثلا ف روحت تاني يوم وسافرت عادي”.

وتابعت: واتحقق معايا ان فيه بيانات عميل اتسربت من السيستم من عندي والبيانات اتسربت الساعة 10:38 بالليل اللي هو انا بخلص شيفتي الساعة 5 ف ازاي البيانات هتتسرب من عندي ! والسيستم دا مينفعش يتفتح غير ف الشركة يعني ماينفعش افتحه ف بيتنا مثلا واشتغل عليه ! قالو يعني احنا لو راجعنا الكاميرات مش هنلاقي انك موجودة ف الوقت دا ف قولتلهم اكيد لان اخر شيفتات البنات ف المكان 7 وانا شيفتاتي كانت ل 5.

واستكملت: “قالي طيب ممكن تكون البيانات اتسربت ازاي قولتله اني بكتب ال username وال Password ع الجهاز اللي بشتغل عليه ف ممكن اكون نسيت وقومت من مكاني وحد شاف الباسورد وفتح حسابي بالليل وعمل كدة ودا ممكن يكون إهمال مني تمام”.

واضافت: “اللي كانت معاه اخدت موبايلي قلبت في الواتساب وبحثت عن الأرقام اللي البيانات بتاعتها اتسربت ملقتش الأرقام دي عندي ولا لقت ان حد باعتهالي اني اجبله بيانات الخط يعني ملقوش عندي حاجة تثبت اني انا اللي عملت دا.. قالي تمام امضي علي اللي قولتيه فبراجع اللي مكتوب لقيتهم كاتبين ان طبيعة شغلي اني بقابل عملاء وببيع خطوط واني اقدر افتح رقم عميل وهو واقف قدامي وانا اصلا خدمة عملاء call center مش فرع قولتلهم ان دا غلط ودي مش طبيعة شغلي وعدلوه ومضيت عليه”.

اترفدت من الشركة بسبب تسريب البيانات

واردفت: “تاني يوم اتصلو بيا وبلغوني اني اترفدت.. اترفدت وانا مكنتش موجودة في الشركة في الوقت اللي البيانات اتسربت فيها والكاميرات كانت بتثبت كدة لان دي مش مواعيد شغلي.. اترفدت بعد م قلبو في موبايلي وملقوش عندي اي حاجة تثبت ان فعلا انا اللي عملت دا ، اترفدت بشكل تعسفي من غير م امضي ع اي إنذار بالرفد قبل كدة طول فترة شغلي لاني عمري ما غلطت ولا قصرت ف حاجة”.

وأكملت : “التحقيق دا حصل مع اكتر من حد قبلي والاجراء اللي كان بيتاخد إنذار بالرفد ولو الموضوع اتكرر بيبقى رفد المرة اللي بعدها بس انا محصلش معايا دا اومال ازاي it’s okay to make mistakes !.. هو كان غلط مني وإهمال اني نسيت الباسورد بتاعي مكتوب ع الجهاز وقومت”.

كلوا عليا فلوسي وقالولي مش عارفين نعملك ايه

وواصلت :”بلغت الكل إني أتظلمت لأني فعلا معملتش كدة والكاميرا أكبر إثبات إني مكنتش موجودة ومعملتش دا ! فضلو يماطلو فيا وقالو أحنا عارفين أنك متعمليش كدة ومش فاهمين دا حصل إزاي لحد ما عدا أسبوع او 10 أيام وقالو مش عارفين نعملك حاجة حتى فلوسي اللي اشتغلت بيها منزلوهاش ! ”

واوضحت :روحت أشتكيت في مكتب العمل قالي أن دا رفد تعسفي بس مش هقدر ابعت فاكس رسمي لأنك للأسف جيتي بعد 10 أيام المفروض تبلغي ف خلال الوقت دا بس هحاول اتكلم بشكل ودي وأن شاء الله يحصل حاجة ولحد دلوقت انا اتظلمت وحقي ضاع .

واضافت : متأكدة أن كل اللي حصل دا حصل بشكل مقصود ومتعمد بس أنا مش مسامحة أي حد ظلمني وحسبي الله ونعم الوكيل ف اي حد كان سبب ف دا

واختتمت حديثها: يا جماعة هما اتصلو كلموني إني احذف البوست ولما قولتلهم لا قالولي إحنا خايفين عليكي من اللي هيحصل لأنك مش واحدة قدام واحد انتي واحدة قدام جيش فودافون حاسة انهم كانو بيهددوني تقريبا