رئيس تحرير المصري اليوم الأسبق: النت عندي عطلان بقاله اسبوع والمفروض اني اصدق كلام الوزير عن سرعة الانترنت

انتقد محمد السيد صالح رئيس تحرير المصري اليوم الأسبق، تصريحات الدكتور عمرو طلعت وزير الاتصالات وتكنولوجيا المعلومات،بشأن سرعة الانترنت في مصر.

وقال محمد السيد صالح عبر صفحته الرسمية بموقع التواصل الاجتماعي فيس بوك: النت عندى فى البيت اللى على الخط الأرضى، التابع ل we، عطلان من أسبوع كاملو

من شهرين تقريبا، بدأ يتعطل كل أسبوع مرة أو مرتين. نشتكى يقولوا فيه تجديد.. والمهم أنه كان بيرجع لوحده. لجأت للمعارف من الزملاء و الصحفيين او فى الشركة، وللخطوط الساخنة جدا بتاعتهم،وللميل بتاع we.. لكن مفيش فايدة.

وتابع رئيس تحرير المصري اليوم الأسبق: تعاملت مع خدمة عملاء وفنيين، يشبهون فى تصرفاتهم وتفاعلهم، أجهزة الرد الآلى العقيمة.. والأزمة أننا فى عز الدراسة وامتحانات الميد تيرم شغالة والتيرم قرب. الأمر كارثى. حد عنده حلول؟

وأكمل محمد السيد صالح: للأمانة،حاولت أنقل لشركة تانية،لكن خدماتهم مش ولابد.. ومن سنوات معدودة،وقبل الاعلانات والدعاية المستفزة اللى بتتكلف عشرات الملايين،كانت الدنيا أسهل. نكلم حد فى السنترال.. حد فى الشركة، أو فى الوزارة،تلاقى الدنيا أتحركت والعطل تم حله.

وواصل : دلوقتى واضح أن فيه حاجة،أو حاجات غلط كتيرة قوى.. بيكسبوا كتير،ومش مهم العملاء. أو فيه فراغ كبير بين المديرين والفنيين. أو هو سوء وترهل فى الإدارة بشكل عام.

وأوضح رئيس تحرير المصري اليوم الأسبق: والأهم،انه مع كل ده وتردى الخدمة الواضح جداً للجميع، لازم علينا كصحفيين أننا ننشر بيانات وزير الاتصالات وبأننا نمتلك أفضل شبكات أنترنت فى أفريقيا!

و أضاف : وأنا مفروض أصدق الوزير وبياناته الرسمية،واكدب نفسى،وأكدب كل اللى اعرفهم اللى بيحصلوا على خدمة رديئة إلى أقصى حد.

وتابع : أنا لا املك طموح بأنهم يتغيروا..بس على الأقل عايز تفاعل من الشركة زى اللى كان موجود من قبل الوضع الحالى العجيب.. اللى بيكسبوا فيه كتير، وبيقدموا خدمة سيئة.