عمرو أديب: التجار مزودينها أوي.. ساندويتش الفول فاضي والناس مش مستحملة تاخد بضاعة سيئة كمان

شن الإعلامي عمرو أديب حملة من الهجوم علي التجار بسبب انخفاض جودة المنتجات بالرغم من زيادة الأسعار في الفترة الأخيرة،مطالبا المواطنين بأخذ حقوقهم .

وقال عمرو أديب خلال تقديمه لبرنامج «الحكاية»، المذاع عبر فضائية «MBCمصر»، مساء الأحد: «هناك شكاوى إن جزء من كارتونة البيض بايظ، زمان كنا نجيب البيض وكلهم حجم واحد، دلوقتي في النص اثنين صغيرين، طب مانا دافع! عاوز فلوس زيادة وحاجة بايظة وكل ده بالحلال؟ هو في إيه يا جماعة؟؟».

وتابع عمرو أديب، :”متفهم إن الحاجة غليت وماشي، بس ليه الحاجة جودتها قلت، و حجمها قل، وكل لما تشتري حاجة؛ تلاقي الموضوع ده، وأقول لـ التاجر: أنت غليت الحاجة، طب ليه مستوى الحاجات والسلع بقى وحش ومتدهور، وبقى أصغر؟”.

وأكمل عمرو أديب،:”جبت ساندويتش فول؛ لقيت الحشو فيه قليل جدا، والساندويتش مافيهوش حاجة تقريبا”، متسائلا :”إيه الفكرة يا جماعة؟، وتلاقي حجم صغير، وحجم كبير في ساندويتش الفول، ومش فاهم إزاي ده”.

وواصل عمرو أديب :”انتوا مزودينها أوي، ارحمو من في الأرض يرحمكم من في السماء، وعايز اعرف مستوى الأرباح لو قَلِّت بدل من 40%، تبقي 20%، هيحصل إيه؟”.

وأوضح عمرو أديب: «أنا مش من النوع الذي يطلب من الدولة التدخل وتحكم الرقابة، لن يحدث ولا يحدث، إنما الدولة في إيدها أدوات أخرى، تستطيع ببساطة إنها تخلي الناس ترحم الناس، ارحموا من في الأرض يرحمكم من في السماء، كلنا راكبين مركب واحدة، مستوى الأرباح اللي بـ30% و35% لو بقت 20% هيجرى إيه».

واردف عمرو أديب: «المواطن لما يقول إديني فلوسي، أنا مش لاقي الفلوس في الأرض، يبدأ الضبط بقا، العقاب الشعبي يكون بألا تذهب لهذا المكان مرة أخرى، وأضيع فلوس في لحمة يطلع طعمها سيئ».

واضاف الإعلامي عمرو أديب: «خد حقك يا مواطن دي فلوسك وتعبك، الناس مش مستحملة تاخد بضاعة سيئة، وأؤكد هناك شرفاء كثر ويحافظون على جودة منتجاتها، لكنني أتحدث عن سوق يأكل 100 مليون بني آدم، خد حقك بالعقاب الاقتصادي».