عميل عن شركة العربي جروب: “اشتريت منهم بوتاجاز تورنيدو ومكملش أسبوع وفرقع.. واسوء خدمة عملاء اتعاملت معاها”

سرد شخص يدعى ” عبد الرحمن أحمد” تجربته الشخصية مع شركة العربي جروب لأجهزة المنزلية والإلكترونية، وذلك عبر موقع التواصل الاجتماعي فيس بوك

وكتب “عبد الرحمن أحمد”: القصة أن أنا عريس جديد وجايب كل الأجهزة بضمان العربي علشان معروف عنهم أنهم احسن وكيل في خدمه ما بعد البيع لكن للاسف أتضح أني معرفش حاجه.. البوتاجاز مكملش أسبوع استخدام وفجأة بدون أي مقدمات او اسباب سمعنا صوت فرقعه من المطبخ (الحمد لله أن مكنش في حد في المطبخ ساعتها).. جرينا نشوف في إيه لقيت البوتاجاز زي ما هو في الصور كده أكبر حته فيه ٢ سم وطبعاً ده سرطان زجاج واضح جدا يعني مش كسر “.

وتابع: “كلمت 19319 و شرحتلهم اللي حصل خد مني بيانات و”العنوان” وقالي الفني هيجيلك بكره وجالي رساله أن معاد الزيارة بكره بعديها بشويه الفني أتصل يأكد العنوان فقال العنوان غلط وصححتهوله”.

سيدة تهاجم العربي جروب: “شاشات توشيبا سمارت في الضمان وفيها عيوب صناعة.. بقيت من أسوء الشركات اللي ممكن عميل يتعامل معاها”

وأكمل : أول مشكلة.. خدت أجازه من الشغل يوم الزياره خدمه العملاء كلموني الساعه ١٠ الصبح يأكدو العنوان وبرضو قالو العنوان غلط !! صححتلهم العنوان قالولي الفني هيكلمك دلوقتي يقولك هييجي امتى انتظرت محدش أتصل كلمتهم قالولي الزياره اتأجلت لبكره !!! بكل برود ومن غير حتى ما حد ياخد رأيي او حتى يبلغني!!! والسبب ان العنوان كان غلط وان دي غلطه من عندهم بأعترافهم بعد مكالمات كتير ومحاولات أنه يجي النهارده لأني مش هعرف اخد أجازه تاني موصلتش لحاجه وقالولي برضو هيجيلك بكره

وأوضح: “تاني مشكلة.. تاني يوم الفني جه وعمل التقرير بعدها كلموني يبلغوني ان ده سوء استخدام وهيتكلف ١٤٠٠ +٢٠٠ تركيب!! وأن السبب إن ممكن يكون البوتاجاز جه عليه نقطه مياه !! اه والله قال كده، طبعاً هو مكنش في حد في المطبخ ساعتها بس حتى لو هل من المنطقي ان بوتاجاز محطوط في مطبخ وبيطحط عليه حلل فيها سوائل ميجيش عليه مياه ؟؟ طبعا بلغته أن ده غير منطقي وإني مش مقتنع بالكلام ده وأن ده تهرب من المسؤوليه وإني عايز أعمل شكوى قالي خلاص هنبعتلك فني تاني بكره وبعد المكالمة اتبعتلي رساله بميعاد الزيارة”.

سيدة تشكو من العربي جروب:” اشتريت منهم سخان توريندو وطلع فيه عيوب.. والفني كتب في تقرير الشكوي أن السخان طبيعي”

وواصل : تالت مشكلة.. خدت اجازه من الشغل تاني والصبح بالفعل كلمتني واحده من خدمة العملاء بتقولي في ميعاد زيارة النهارده وايه هي المشكله أصلاً! حكيتلها القصه كلها قالتلي طيب هراجع المشكله مع الدعم الفني وارجعلك..انتظرت أنها تتصل ماتصلتش ، اتصلت على نفس الرقم ردت عليا بقولها انتي مردتيش عليا الفني هيجي امتى؟ بكل برود تقولي لا أنا لغيتلك الزياره! علشان الدعم الفني قالي أن ده سوء استخدام ! قولتلها أيوه إيه الجديد ما ده اللي قولتوه قبل كده وأنا قدمت شكوى وبناءاً عليه حددتولي ميعاد تاني للزيارة! قالتلي بكل برود لو هتدفع هيجيلك مش هتدفع مش هيجي

واضاف : “قفلت معاها واتصلت ب 19319 تاني وعملت شكوى وحددولي ميعاد تاني لزياره الفني ..ومحدش اتصل بيا برده طول اليوم كل ما اكلمهم يقولي الفني هيتصل بيك لحد الساعه ٥:٣٠ كلمني بعد كل ده يقولي أنا جاي أغير القطعه على حسابك موافق ولا لا .. وضحتله أنه المفروض انه جاي يعمل تقرير جديد علشان أنا موافقتش واعترضت على التقرير وأن أنا بقالي يومين الدعم الفني بيقولي انك جاي تعمل تقرير جديد انا استفدت ايه ؟.. قالي ده اللي عندي موافق ولا، منتهى الاستهتار وقله الزوق .. ده شكل بوتاجاز تورنيدو بعد استخدام اسبوع وتوكيل العربي مش عايز يتحمل المسؤولية!!”

واختتم حديثه: ” دي تجربتي مع تورنيدو والعربي اللي للأسف كل أجهزه البيت كلها من عندهم لا تحمل مسؤليه ولا إحترام لمواعيد “.