مرتضى منصور: جالي سكر بسبب اللي حصل في نادي الزمالك، وبحمل الدولة المصرية المسئولية

قال مرتضى منصور رئيس نادي الزمالك في تصريحاته له عما حدث في نادي الزمالك وما نتج عنه من تأثير على صحته.

فقال منصور: “أنا ليا سؤال جمهور الزمالك العظيم اللي أنا مستحمل عشانه.. هو حضرتك عايزني أتدخل ولّا مش عايزني أتدخل في الجهاز الفني.. مش هتدخل.. وفيريرا أعظم مدرب جه في تاريخ مصر كلها ووراه ومسانده بس عايز أفكرك بحاجة.. هو فيريرا ده لما جه أول مرة 2014/ 2015 مش أول ماتش ليه اتعادل مع إنبي؟ أيوه وخد الدوري والكاس أيوه.. وشكرًا.. طب لما جه المرة دي أول ماتش اتغلب من منين؟ من إنبي وخد إيه بقى؟ دوري وكاس”.

وفيما يتعلق بحالته الصحية، قال مرتضى منصور: “بحمد ربنا الحمد لله طبعًا الفضل لربنا.. ويمكن الدكتور طارق يوسف تاني مرة ينقذني لإنه في أعتقد أبريل سنة 21 وقعت لما جابوا اللجنة يعني عمري ما كان عندي سكر ولا ضغط فهو طبعًا دكتور طارق في العمارة اللي في وش بيتي على طول فأمير أو الحاجة كلموه جه بسرعة فقال لازم يطلع ع المستشفى يخش العناية المركزة”.

وأضاف: “مفيش نقطة مية في جسمي خالص وبيجيبولي جهاز السكر فكل ما يجي أقيس ألاقي مكتوب high ..high إيه ده بايظ هاتوالي غيره.. أتاريه عدى الـ 550 وأنا ما كانش عندي سكر ده م اللي حصل في نادي الزمالك.. ده م اللي الدولة عاملاه فيا من 2020 وأنا بحمل الدولة المصرية المسئولية قدام مصر كلها”.

واستكمل منصور، حديثه عن رحلة علاجه مع الدكتور طارق يوسف، قائلًا: “الراجل عالجني الحمد لله.. وخدني واحدة واحدة.. الأول بالانسولين حقنتين في اليوم.. وبعدين بقت حقنة.. المهم الحمد لله لغاية ما ربنا عفاني وشفاني”.