بكلمات جميله الفنان تامر فرج يتحدث عن الفنان محمود عامر

كتبت : أوركيد سامي 

نشر الفنان تامر فرج بوست عبر حسابة الشخصي على موقع التواصل الاجتماعي “فيسبوك”.
عبر فيه في ذلك البوست عن حبه الشديد ودعمه للفنان محمود عامر، وكان ذلك بكلمات طيبة ورسالة جميلة إلي الفنان والجمهور
قائلا “الراجل ده الناس فاكره انه مجرد ممثل كويس ابدع فى مشهد فظهرت امكانياته فالناس ابتدت تتكلم عنه بعد سنين شغل.
لأ.الراجل ده أكبر من كده بكتير
الراجل ده ما قعدش يدور على الشهره والفلوس والادوار اللى تفرقع مع الناس، وقام خد موهبته و حبه للفن و للبلد ونزل على القرى والنجوع والاقاليم المختلفه فى مصر، ونزل للناس فى الشارع و دخل عليهم حاراتهم و بيوتهم بعروض تمثيليه ثقافيه عشان ينهض بتفكيرهم و وعيهم ويعيد ترميم ثقافتهم!!
الراجل ده نزل بالفن والثقافه للشارع وللانسان البسيط واللى تحت البسيط كمان، وماقعدش يمصمص فى شفايفه فى البرامج على أحوال الناس و ثقافتهم، ولا قعد يهاجم الوزارات والمسئولين فى بوستات على السوشال ميديا، ولا قعد ينظر على الناس فى المسارح بعروض ثقافيه مجعلصه
خالص.
خد شنطته من سكات وشال فنه وموهبته على كتفه بهدوء وأدى رسالته و رسالة كل فنان بكل شجاعه…ايوه بكل شجاعه لأنى متأكد انه كان بيصرف احيانا على العروض دى من جيبه
هو ده عم محمود عامر
واللى مش مصدقنى يتابعه على صفحته الشخصيه ويشوف العروض اللى بيعملها و ازاى بيسقى الشعب الغلبان الثقافه و النور و الوعى بالمعلقه
ومستغربين انه يعمل عظمه فى حتة مشهد؟؟
دوروا بس يا مسئولين عن الاعلام والثقافه والإنتاج وانتم تلاقوا مليون” محمود عامر ”
بس الناس دى بتشتغل لربنا و فى هدوء ما بتعرفش تعمل بروباجندا على السوشال ميديا ولا بيعرفوا يجيبوا عدد فولورز ولايكات
صباح الفل يا عم محمود وان شاءالله ربنا هيكرمك ولو بعد حين ”
و ذلك كان تعليقا من الفنان تامر فرج علي دور محمود عامر الموثر في مسلسل اعمل ايه ”