حكاية شقة بـ4 مليون جنيه ومشاجرة على 100 ألف سمسرة بمدينة الرحاب (صور)

نشر شاب منشوراً يشكي فيه من تضرره من عملية نصب تعرض لها من سيدة أعمال توجهت إلى مكتبه لشراء شقة سكنية في مدينة الرحاب تبلغ قيمتها 4 مليون جنية، وبعد الاتفاق مع البائع قررت صرف عدم شرائها بينما ذهبت بعد يوم، واتفقت مع المالك علي شرائها دون وساطة السمسار.

“محمد الغريب” كشف عما حدث له، ونشر شكوته عبر صفحة “اخبار سكان الرحاب”، قائلاً:” أنا بعمل مسوق عقارات “بروكر “، وحضرت ليا سيدة تريد شراء شقة سكنية فى مدينة الرحاب، واتفقنا على العمولة، وطريقة الشغل، وأحضرت لها المواصفات المطلوبة، وسعر الشقة كان 4 مليون ونصف جنية، وبعد ما عرفت موقع الشقة، وأخذت كافة المعلومات عن الشقة وفجأة قالت ليا لن اشترى الشقة، وطبعاً ده بعد تعب، ومعاينات أكثر من شقة، ولم أخذ منه أموال مقابل ذلك، وقولت لما ربنا يكرمني وتشترى أخذ حقي.

وأضاف:” المفاجأة باني فوجئت بأنها راحت لصاحب الشقة وعملت معاه اتفاق لأن صاحب الشقة خذ المعلومات من الأمن ورقمهم وخصلت الشقة في الشركة بمصدق ووقعوا تنازلن وأكلوا عليا العمولة يعني دفع 4 مليون ونصف واستحلت تعب شاب العمولة بس 75 ألف ودا أقل كمان من حقى مع ان الرسمى والقانون والعرف ١١٢ ألف بمعدل ٢.٥%.

وتابع:” أد ايه أنا حزين انى شوفت موقف زى دا ليه استخسرت فيا حقي وكمان البائع اشترك معها فى ضياع حقي وانا يتيم وعندي التزامات وبالصدفة زميلى شفها في الشركة وهى تقوم بتوقيع عقد الشراء، ولما قالها فين حقنا قالت له متخفش كنت هتصل بيكم واديكم ١٠ آلاف قالها لاء خليهم ليكى وحسبنا الله ونعم الوكيل.

موضحاً:” أنا عاوز اقولها وأقوله ويا رب يشوفوا البوست وانا اخترت اكبر صفحة فى الرحاب وادمن حقانى علسان تشوف رسالتي وتعرف انها ظلمتني وظلمنى وياريت السكان تقول شهادة حق هو ينفع دا يحصل منها ومنه وعندى كل الأدلة والصور والرسائل وكمان حضرتها صاحبة شركة كبيرة يعنى شبعانة وعمولتي مش تفرق معها ارجوكم ساعدوني، وعايز حقى وانا واثق ان ربنا هيدينى حقى فى الدنيا والاخرة وانا مش هسيب صفحة او جروب ولا واتس أب الا لما احكى قصتى.

خناقة الرحاب

وجاءت ردود التعليقات ما بين المتعاطف مع السمسار، وما بين الهجوم عليه بسبب ضخامة المبلغ الذي يتحدث بأنه حقه، ويريد الحصول عليه مقابل بيع الشقة، والتى يبلغ ثمنها 4 مليون جنية ونصف.

وقال حساب لفتاة تدعي “أزمة عمارة قائلة”:”وهو السمسار اللي بيتكلم عن حقه ..سؤال بسيط هو انت شغال قانوني في السمساره يعني بتدي حق الدولة يعني معاك بطاقة ضرابية وسجل تجاري .. للأسف معظم السماسرة شغلين بالفهلوة والحداقة ..!! دا يا راجل بتاخدوا من البائع والمشتري النسبة كلها.. دا انتوا خربتوا البيع والشراء والتأجير في الرحاب دا انتوا بتشتغلوا علي اليوم الواحد واليومين والاسبوع بتأجير عشر اضعاف السعر .. لم نتكلم علي سوق العقارات في الرحاب نبقا نتكلم مع ادارة ليها كيان وسابقة اعمال مش قاعدة بيانات عملاء دا انتوا قرفتوا معظم السكان اللي غلقه شققها ومسافرة في زانكم علي تأجير الشقق .. بلاش يا جماعة التعاطف مع ناس مش بترحم ..والرزق دا في ايد الخالق عز وجل ..

وقالت شيماء داود والتي تعاطفت مع السمسار:”لا طبعا ناس معندهاش ضمير وجشعه جدا كان ممكن تفاصله لكن تستحل حتى التليفونات والمشاوير اللي عملها ببلاش كده ليه يعنى؟ طالما استفادت كانت ادتله تعبه، والغلط فى البوست انك كتبت العموله كام لان المشكله مش في المبلغ المشكلة في قلة الادب وعدم الضمير وان حد يستحل شقى حد وياكله عادى كده!! ايه القرف ده الناس دى بتنام ازاى والله؟.

وأوضحت:”مش هتناقش في أنه يمكن يقعد شهور والا سنه على ما يبيع شقه يعنى مش كل شهر بيدخل الرقم ده ومع ذلك برده تعبه واللي حابب يفاصله لكن مش يأكل حقه عشان كتير حرام كده حقك عند ربنا يابنى واللي عند ربنا مش بيضيع وربنا يعوض عليك، بس رأيى اوصلهم واتفاهم معاهم وخد مبلغ اقل احسن من مفيش حتى لو جزء من حقك لكن متسيبش خالص ارضى باللي يرضوا بيه معلش وربنا يعوض عليك”.