حنان مطاوع: عمري ما تخيلت إني ممكن أوقف شغلي عشان غزة.. أنا متضامنة معاهم بس هفضل أشتغل

كشفت الفنانة حنان مطاوع، عن رأيها فى فكرة التوقف عن تصوير الأعمال الفنية تضامناً الشعب الفلسطيني، على إثر العدوان الإسرائيلي على قطاع غزة.

وقالت حنان مطاوع في تصريحات صحفية: في كتير من الناس مش بيحترموا الفن وكتير من الفنانين مش شايفين إنهم بيعملوا شيء عظيم، مش شايفين أهمية الفن، أنا متضامنة مع غزة من وأنا صغيرة وكنت في الجامعة بمشي في مظاهرات وكنت عايزة أطلع قوافل، ومرة أمي جابتني من دماغي وقالتلي لما تتمي سن الرشد وتبقي سليمة، عشان أنا عندي ديسك في ضهري، ومتبقيش عالة على الناس ويمرضوكي بدل ما يمرضوا الجرحى، وتبقي فلوسك مع نفسك.

وتابعت حنان مطاوع: لكن عمري ما تخيلت إني ممكن أوقف شغلي عشان غزة، أنا متضامنة معاهم بس هفضل أشتغل، الفنان ده بيثير وجدان أمة ووعيهم، الفنان بسمة وشئ عظيم، حتى الحضارات بيتم تخليدها بالفن، زي الحضارة الفرعونية، وصلتلنا من خلال الرسومات، فالفن شئ عظيم جدا، بس هو شقين، ولازم إنتي كفنانة تبقي مقتنعة باللي بتعمليه ومؤمنة به حتى لو كان كوميدي أو استعراضي.

وواصلت حنان مطاوع: زي فيلم مولد يا دنيا إخراج أستاذ حسين كمال، عبارة عن راجل عايز يكوّن فرقة من النشالين، فمن خلال الفن بيتحولوا من حرامية ونشالين إلى ناس ذو حيثية في المجتمع، يعني مش لازم تقول شعارات عشان أبقى بعمل حاجة عظيمة.

واوضحت حنان مطاوع: الفن مش بس أداة للترفيه، وحتى لو للترفيه، إزاي نسخف منه، ده النبي صلى الله عليه وسلم بيقول تبسمك في وجه أخيك صدقة، إنك تدخل السرور على قلب أخيك، بيستهينوا بإنك ممكن تسعد إنسان أو تحط عليه ابتسامة، ده إحنا بناخد عليها صدقة.

واضافت حنان مطاوع: كلنا محتاجين إننا نتوب عن أخطائنا كبشر، بس مش عن الفن، والفن مهنة شديدة الخصوصية، لأنها بتلعب على أوتار الوجدان والعقل، عشان كدة الصهاينة حسبي الله ونعم الوكيل فيهم لما بيحبوا يهيمنوا على أمة، بيدخلوا على حتتين، الإعلام والفنون، وبيقلبوا الحقائق ويعملوا فيلم يعيطوا فيه الناس على قضيتهم هما، هما مدركين بأهمية الفن والإعلام والكلمة.