عروض وهمية.. أحد عملاء كارفور محذراً بعد تعرضه لخسارة مالية

تداول احد رواد مواقع التواصل الاجتماعي تجربته مع كارفور ابليكيشن بعد شراء شاشة سامسونج، وتعرضه لخسارة مالية ” بتاريخ ١٣/١/٢٠٢٣ قمت بشراء تليفزيون سامسونج ٦٥ بوصة من الابليكشن الخاص بكارفور باجمالي مبلغ 10699 جنيه مصري وتم تاكيد الاوردر”

 الغاء الاوردر بدون إعلام المشتري

وتابع “بتاريخ ١٦/١/٢٠٢٣ قمت بالاتصال على الخط الساخن الخاص بكارفور لتاكيد الاوردر وانه فعلا هيوصلوه، عشان كان قدامي اني اجيبه بنفس السعر بس من مورد تاني، وردت مسئولة الاتصال الخاصة بخدمة عملاء كارفور: “مادام الاوردر ظاهر عندي على الشاشة فكده حضرتك الاوردر متاكد والحاجة موجودة وهتجيلك يوم ١٨/١/٢٠٢٣” وسالتها اكتر من مرة الاوردرمش هيتلغي، وهي اكددت انو لا يا فندم الاوردر هيوصل في معاده!! فكلمت المورد وقلتلو لا خلاص مش محتاج التليفزيون من عندك كارفور هيوصلو واكدو عليا بناء على المكالمة اللي تمت معاهم!!.”

ولكن قام كارفور بالغاء الاوردر بدون تواصل معه حيث قال “بتاريخ ١٨/١/٢٠٢٣ اللي هو المفروض يوم التسليم كارفور: قرر يلغي الاوردر ومايبعتش التليفزيون!! بدون مايتواصلو معايا ولا احتراما لعملائه!! وده ليه عشان المجلة الجديدة نزلت وسعر التلفزيون غلي 3.500 جنيه فيكنسل الاوردر، ويبيعو بسعر اعلي ومش مهم العميل اللي احترم كلمه مؤسسة زي الفطيم ويلغي مع المورد اللي في الشارع!!”

إهمال خدمة العملاء وعدم متابعة الشكوي 

وعند سؤاله عن سبب هذا الاجراء لم يكن هناك مبرر وقاموا بتقديم شكوي حيث قال ” بتاريخ 18/1/2023 كلمتهم عشان استفسر عن الاجراء اللي اتخد من جانبهم فرد عليا مسئول الاتصال وقالي لا معرفش فهنسجل شكوي وسجلت شكوي برقم 3885724 ومحدش اتواصل معايا غير لما كلمتهم تاني يوم الخميس 19/1/2023 وكان الرد:

“بنعتذر جدا بس التليفزيون مش موجود ومش هنوفرو لحضرتك عشان مش موجود في المخازن” ده وفقا لكلام أ/ منه الله مصطفي – مديرة ادارة الشكوي” طيب ازاي يا جماعة كان موجود وقت الطلب ووقت ما كلمت الزميلة!! ودلوقتي مش موجود مع العلم ان المرفق رقم 4 و5 دول اسكرين شوت من الابليكيشن بتوافر المنتج بتاريخ 20/1/2023 الساعة 12:30 ظهرا.

عروض وهمية وخسارة مالية

واختتم انه تعرض لخسارة مالية بسبب فارق السعر وارتفاع الاسعار قائلاً “بجد ده استهتار وتضليل وعروض وهمية كمان وبسبب اللي حصل ده من كارفور سعر نفس التليفزيون في بعض الاماكن زاد من 3500 الي ٧٠٠٠ جنيه!! ليه اتحمل عدم احترام العملاء واجيب التلفزيون بسعر اغلي!!”