فتاة تشكو من كافيه costa بسيتي ستارز :”المدير بيقولي فستانك مفتوح أوي”

كشفت فتاة عن تعرضها لموقف غير لائق وانتهاك للخصوصية ،في كافيه costa بسيتي ستارز ، علي يد مدير وعاملة المكان ،موضحة أنها تعرضت لموقف محرج الي جانب المعاملة السيئة.

حيث كتبت عبر موقع التواصل الاجتماعي فيس بوك، قائلة : “مساء الخير عايزه احكي عن موقف سئ جدا أتعرضتلوا أنا عايشه بره مصر وكنت فمصر أجازه فرحت مع واحده صاحبتي سيتي ستارز.. وكنت لابسه انا وهي فستان طويل عادي جدا ( اصلا متعوده البس الفستان ده فمصر من قبل مسافر) ..وروحنا قعدنا ف costa cafés الي فوق zara بغض النظر ان الخدمه كانت سيئه وفعليا الحاجه كانت بتترملنا علي الترابيزه بس مش ده موضوعنا”.

وتابع: قعدنا وشربنا القهوه وأنا كنت قاعده فالترابيزات الي بره علي الطريق مش جوه المحل..المحل كل الي بيشتغل فيه رجاله ماعدا بنت واحده كانت هي الي واقفه جوه علي مكنه القهوه فجاءه لاقيت البنت جيالي من جوه مخصوص ولاقتها بتقولي وبمنتهي البرود يا فندم dress حضرتك مفتح اوي فالاول أنا اتصدمت وماستوعبتش الكلمه ولاقيت نفسي بقولها نعم؟ ..قالتلي نفس الجمله تاني بصيت علي نفسي اصلا رجلي كانت داخله جوه الترابيزه يعني الي يعلق تعليق زي ده لازم يكون حرفيا دب عينه جوه الترابيزه ووطي كمان علشان يشوف رجلي”.

وواصلت :” فقلتلها أنا قالتلي أيوه من غير ما أحس لاقتني بقولها هو في حد أشتكالك مني أنا خدشت حياء حد يعني وبعدين أنا لابسه شورت اصلا ( كان شورت كارينا بيچ لأن الفستان كان فاتح) فقالتلي لا أنا علشانك بس حبيت أقولك قلتلها لا معلش أنا واخده إني البس كده

فمشيت”.

واستكملت :”فبصراحه أتعكننا جدا وقررنا نحاسب ونمشي فالمدير وأنا بحاسب لاقيته بيبصلي بصه وحشه جدا كأني لابسه بدله رقص فقلتله حضرتك المدير قالي أيوه حكتله الي حصل لاقيته بيقول نفس الكلام وبيقولي ده علشانك مش حد تاني.. فطبعا بدأت أتعصب وأزعق وقلت دي قله زوق ودي حريه شخصيه كل واحد يلبس الي يعجبه ومش من حق أي حد يعلق علي لبس غيره زي منا مش من حقي أعلق علي حد وبعدين انا مفيش حاجه باينه من جسمي معني كده ان هي او حد غيرها وطي بس جوه الترابيزه علي رجلي بصراحه انا أنفعلت جدا لان أسلوبهم كان سئ جدا وشكلهم وهما بيتكلموا مكنوش معترفين بأي غلط او تعدي علي حقوق غيرهم “.

واضافت :” فالأخر لما بدأت أزعق والناس تسمعني قالي أحنا آسفين وسوء تفاهم وجاب البنت علشان تعتذر فقلتله تمام بس أنا هعديها بس في غيري ممكن مايعدهاش وياريت تاخدوا بالكوا وتخليكوا فنفسكوا”.

واختتمت حديثها: “الحقيقه أنا مش عارفه هو ده طبيعي أن حد يعلق بالشكل ده والغريب إني لاقيت ناس كتير لابسه شورتات وكط وقصير ومفتوح ومحدش أتكلم معاهم هل ده طبيعي أننا نعلق علي لبس حد وننتهك خصوصياته بالشكل ده..بصراحه كان موقف سئ جدا وحبيت احذركوا”.