«عشان شكلي حلو».. أحمد عز يفجر مفآجات عن كواليس بدايته الفنية

كشف الفنان أحمد عز، عن كواليس مشاركته مع الفنان نور الشريف في فيلم “مسجون ترانزيت”، كما تحدث عن نصيحة الزعيم عادل إمام له.

وقال عز، خلال ندوته في مهرجان القاهرة السينمائي: “قابلت عادل إمام، وقالي عايز تنجح عندك حاجتين الالتزام والورق، هما أمتع شغل في الدنيا، وهي أقسى شغل من حيث التعب، ونصيحته عايش بيها لحد دلوقتي”.

أحمد عز في مسجون ترانزيت

وعن نور الشريف، أضاف عز: “لقيت الأستاذ نور الشريف في فيلم “مسجون ترانزيت”، كنت مستكبر إن اسم يتكتب جنب اسمهم، وإن هما يعملولي فيلم، مين أنا، وأشوف راجل في منتهى الكرم والنجومية وهو بيقولهم إن عز يتكتب اسمه الأول، وديه كانت حاجه أكبر من أحلامي، وكنا بنصور وأوضنا لازقة في بعض، ولو الكاميرا الساعة 8 بصحى الساعة 6 ونص، والأستاذ نور صاحي من الساعة 5 وجاهز للتصوير، واتعلمت ده دلوقتي، والالتزام هو أساس النجاح، وأنا كنت محظوظ إني اتعاملت مع أساتذة كبار زيهم”.

أحمد عز: نصيحتي لأي حد متقعدش من غير شغل

وتابع: “لحد النهارده عندي ناس لازم أثق في دماغهم، ومش باخد قرارتي بشكل انفعالي، وجه عليا فترة كنت عايز أجرب أكتر من فيلم في السنة الواحده، لإن الأفلام كانت بتتكلف كتير، وكان نفسي أعمل أفلام كتير، والرزق على الله، وفي الأخر هعمل تاريخ، والنصيحة لأي حد بقولهم اشتغل، متقعدش من غير الشغل”.

أحمد عز: جابوني علشان شكلي

واستكمل: “في الأول كنت على قدي في التمثيل، ومجابونيش علشان موهبتي، لكن علشان شكلي كان حلو، وربنا وقعني في أساتذة علموني، ومش مهم الشكل، المهم الروح اللي جواك، وتحس إنك بتعمل ده وأنت صادق، وأنا لو بعمل مشهد وأنا ماشي في الشارع، بعمله مليون في المية علشان أقدر الناس، والناس بتدفع تذاكر غالية، ودلوقتي الدنيا بقت غالية مش زي الأول في السينمات، عمري ما أخليه يروح فاضي، إن شاء الله ياخد تسلية فقط”.