فرح الزاهد ترد على الاتهامات الموجهة لأسرتها: ايه الهبل ده؟! منعرفهاش وعمرنا ما قعدنا في شقة إيجار

ردت فرح الزاهد شقيقة الفنانة هنا الزاهد على الاتهامات الموجهة لأسرتها من سيدة مصرية بشأن التأخير في دفع إيجار فيلا داخل مجمع سكني في 6 أكتوبر.

وقالت فرح الزاهد: إيه الهبل ده ؟! ده مش حقيقي ومنعرفهاش واحنا عمرنا ما قعدنا في شقة إيجار.

وكانت قد خرجت سيدة مصرية تدعى عزة في مقطع فيديو تستغيث من هنا الزاهد وأسرتها بسبب تأجير منزلهم بإحدى المجمعات السكنية بمدينة 6 أكتوبر، وذلك عبر موقع التواصل الاجتماعي فيس بوك.

وقالت السيدة عزة: في يوم جاتلي مكالمة من السيدة شيرين المنزلاوي والدة الفنانة هنا الزاهد، قالت إنها عاوزة تأجر المكان، وزوجي رد عليها بأنه يرفض الإيجار لأنه مش ضامن سفره هيخلص امتى وهيكون محتاج البيت، وخلصنا الموضوع”.

وتابعت: كنا رافضين استئجار المكان لكن جتلنا مكالمة من الفنان الراحل طلعت زكريا، وتوسط لهما على مسئوليته الشخصية، ووافقنا وكانوا عاوزين يأجروا 5 سنين، وطلعت زكريا قال وقت ما ترجعوا البيت هيكون في الحفظ والصون، فإحنا كأسرة اقتنعنا بكلامه وقلناله نأجر 3 سنين فقط، وشيرين مضت العقد بـ 3 سنين وابتدوا يدفعوا الإيجار وساعات كانوا بيأخروا دفع الإيجار بسبب ظروف الشغل.

وواصلت: فسألناهم زي ما وعدونا يرجعولنا البيت، في الحقيقة هما رفضوا يرجعولنا البيت زي ما وعدونا، واضطرينا إن احنا نأجر برة ونقولهم إحنا مأجرين برة وده بيتنا ومحتاجين نرجع زي ما وعدتونا، ف إحنا مأجرين أغلى من الإيجار اللي أنتوا بتدفعوه، فسألتنا بكام السيدة شيرين، قولنالها الرقم، قالتلنا إيه الجشع وإيه الطمع ده وقالت ألفاظ أنا أخجل إني أقولها، وقالت إحنا مش خارجين وأعلى ما في خيلكم اركبوه، وبعدين توقفوا عن دفع الإيجار تماما، ف اضطرينا إن احنا نرفع قضية واننا نسترد البيت، ف المحكمة حكمتلنا إنهم يخرجوا من البيت ويدفعولنا لغاية نهاية عقد الإيجار، إحنا طالبنا بالبيت قبل المدة ما تخلص وكان فاضلهم وقت في العقد، فكانوا توقفوا عن الدفع في فترة، فالمحكمة حكمتلنا باسترداد البيت، يعني في الفترة اللي خدنا فيها الحكم ده كان عقد الإيجار خلص وهما قاعدين سنتين بعد العقد ما خلص في البيت.

وأكملت: وخرجوا من البيت بعد كدة مش عايزة أقول إزاي بس كانت فترة عصيبة علينا جدا إنهم يخرجوا، دخلنا البيت لقينا تلفيات رهيبة، يعني مش عايزة أقول إن الأحواض وجرانيت المطبخ اتاخد مش عارفة إزاي، رفعنا قضية تانية بالتلفيات، والقضية راحت المحكمة استئناف ودرجات القضاء خدناها كلها، لأن كل مرة يرفعوا قضية مضادة، بس الحمد لله القضاء نصفنا وادانا حقنا، معانا حكم محكمة من فبراير 2024 مش عارفين ننفذه، مش عارفين نستدل لهم على عنوان لا عن طريق محاميهم ولا عن طريق الوساطة”.

وإن أثناء ما هما قاعدين في البيت والقضية الأولى شغالة أخو السيدة شيرين المنزلاوي اتصل بينا طالب مننا بيساومنا نديلهم فلوس علشان يخرجوا من البيت، يعني أنا مش عارفة إزاي الفكرة جت في دماغهم، برضه والقضايا شغالة حاولنا نتواصل معاهم عن طريق المخرجة القديرة الأستاذة منى الأبحر إن هما يدفعوا الفلوس اللي عليهم، معرفتش توصل معاهم لنتيجة.

وأختتمت حديثها : السيدة شيرين المنزلاوي أهانت زوجي، وأديت التليفون للفنانة هنا الزاهد بتقوله أنت موت أبونا الفنان طلعت زكريا ودلوقتي عايز تموت أمنا، ف أنا مش فاهمة هي إزاي بتقوله كدة وهي عارفة إيه اللي حاصل، وأنا مش فاهمة هو مين المأذي في الموضوع.