مابين مؤيد ومعارض.. أزمة منع “المايوه الشرعي” تشتعل بقرى الساحل الشمالي (صور)

عادت أزمة منع نزول السيدات المحجبات لحمامات السباحة بأكبر الفنادق السياحية لتفرض نفسها على الساحة مرة أخرى، ما بين مؤيد ومعارض لقرار المنع، منهم من يرى أن المحجبات لا يحق لهم النزول بـ”مايوه شرعي” وعليهم التخلي عنه، وآخرين يدافعون عن حق الحرية الشخصية للمحجبات.

قرية لافيستا الساحل الشمالي، تضع منع النزول بـ”المايوه الشرعي” ضمن تعليمات استخدام حمامات السباحة، كما أنها تمنع بيع وحدات جديدة للمحجبات. الأمر الذي أثار موجة غضب كبرى على القرية، من قبل مستخدمي مواقع التواصل الاجتماعي، منددين بحق المحجبات.

بداية الأزمة كانت مع منشور سيدة تدعى “ميرنا الواصف”، سردت فيه ما حدث معها في أحد حمامات السباحة بلافيستا، قائلة: “لما رحت عشان أنزل واحد من ملاك لافيستا كاسكادا الساحل الشمالي مكانش عاجبه المايوه الشرعي بتاعي، وطلبه من أمن البيسين إنه يطلعني. لما قررنا نروح نشتكي للإدارة قالوا لنا إن ديه القواعد والقوانين بتاعت الشركة، والملاك وقعوا اتفاق في العقد بتاعهم يقول إن ممنوع المحجبات يتواجدوا في البيسين”.

وتابعت: “وكمان اتقال لنا إن دي مش أول مرة يحصل كده وإن في ملاك صوروا المحجبات اللي في البيسين وبعتوها بشكاوى لإدارة لا فيستا.. أنا سمعت عن حوادث كتير شبه ديه في الشواطئ والمنتجعات في البلد لكن عمري ما قدرت أفهم أو أحس إزاي ديه حاجة مهينة لحد لما اتحطيت في الموقف بنفسي. أنا اتضايقت جدًا واتعصبت وأحرجت جدًا لما الحارس جه وشاور لي أطلع”. مضيفة: “مش قادرة أتخيل إن مليش الحق إني أنزل البيسين عشان مش لابسة بيكيني مثلاً!؟.. حقيقي إنت مين عشان تيجي تختار لي ألبس إيه وما ألبسش إيه!!”.

وتباينت ردود الأفعال حول المنشور الذي أخذ حظ وافر من الانتشار، البعض يدعم والبعض يهاجم، حيث عبرت نادية ناصر الأتربي، عن رفضها واشمئزازها من منظر “المايوه الشرعي”، معلقة: “أنا واحده بتقرف من منظر البوركيني ايه الي يجيبكم الساحل، روحو باللبس المحتشم ده اماكن الدين، انا مش حاباه انا حرة.. ياريت نلتزم بقواعد المكان قبل دخوله او نتركة، الملاك معروف ان فى انترفيو قبل التعاقد للعائلة علشان يتاكدو ان مفيش محجبات علشان ميحصلش الصدام والاحراج دة؛ لان احنا اشترينا الشاليهات في قرى فيها قوانين.. يا تلتزم بيها يا متدخلهاش”.

ليست قرية لافيتسا وحدها، فالموقف نفسه حدث بقرية العبد وقرية ستيلا الساحل، حيث هاجم بعض الملاك مالكة ترتدي المايوه الشرعي بحمامات السباحة، يسرد زوجها مصطفى حسن، حاكيًا: “في مثال واقعي حصل لمراتي النهاردة وانا معاها فى pool فى ستيلا الساحل لقيت سكان جايين يقولولها واحنا فى الماية ماينفعش تنزلى باللبس ده او بالمايوه ده !! قالت ليه بكل استغراب وخوف كما لو كانت عملت حاجة غلط . واحدة عندها شاليه زيها زي اى حد وييجى ناس يقولوا لها اخرجى عشان انتى لابسة مايوه شرعى ومضايقة عيوننا بيه!!هنا كله لابس بيكينى او one piece”.