لبلبة: أنا وعادل إمام عشرة طويلة هو توأم روحي وربنا خلقني علشانه

أعربت الفنانة لبلبة، عن حبها الشديد للزعيم عادل إمام، مشيرة إلى أنها تعاونت معه فى العديد من الأعمال الفنية والتي تجاوز عددها 10 أعمال.

وقالت الفنانة لبلبة في تصريحات تليفزيونية: «بكيت وقت تكريم عادل إمام، لأنهم جابوا مقتطفات من أعماله، والعينين دي عينين الأستاذ عادل، تضحك وتبكي، يديكي البؤس والغلبان والفرحان، هو فعلًا زعيم الفن وحبيبنا، عادل إمام ياخد قلبي، ولما أشوفه أبقى حاسه إني شايفة الفن كله».

وتابعت لبلبة: « أنا وعادل إمام عشرة طويلة هو توأم روحي وربنا خلقني علشانه .. وعملنا مسلسلين صاحب السعادة ومأمون وشركاه، أنا بعتبر كل مسلسل فيهم 5 أفلام، بنشتغل 7 شهور، وكل يوم مع بعض وبناكل ونفكر ونمثل مع بعض، أنا عاشرت سينمائيين والأستاذ عادل إمام أكتر ما عشت مع أهلي في بيتي».

واضافت: «العشرة بيني وبين عادل كبيرة وبحس بيه وبعينيه وإمتى هيقول إيه، لا يمكن أبوظ له إفيه، وهو عارف أنا بحبه قد إيه وبخاف عليه قد إيه، وبعرف هو زعلان ولا مبسوط من مشيته في الطرقة بتاع الاستديو».