“الناس بقيت تحت خط الفقر”.. مصطفى بكري يطالب الحكومة بزيادة الرقابة على الأسواق

تحدث الإعلامي مصطفى بكري، عن ارتفاع الأسعار فى الأسواق بشكل كبير خلال الفترة الأخيرة، مطالباً الحكومة بزيادة الرقابة على الأسواق.

وقال مصطفى بكري فى تصريحات تلفزيونية : “عايز أقول للحكومة صحصحي شوية؛ حالة الفوضى اللي بتشهدها الأسواق المصرية سببها الغياب الكبير للرقابة على أسعار السلع؛ الناس كلها بتعاني من ارتفاع الأسعار؛ كل الأسعار وكل السلع كل حاجة بقي فيها زيادات بنسب كبيرة جدا”.

وتابع مصطفى بكري: “اللي بيحصل دة مش عارفين ليه بيحصل؛ محتاجين مسؤول يطلع يقولنا ليه ارتفاع الأسعار بهذا الشكل؟.. انت كيلو الطماطم هنا بسعر وفي حتة تانية بسعر تاني؛ هل دة بسبب ندرة المعروض والا نتيجة جشع التجار؟ عاوزين نفسهم السبب؛ عايزين تواصل مع المواطن بشكل مستمر؛ نحسسه أننا حاسين بمعاناته وناخد المواطنين في صفنا مش نعاديهم؛ محتاجين دور مفتش التموين يرجع تاني وياخد إجراءات”.

وواصل بكري: “مش عايزين يكون للسلعة أكتر من سعر؛ لازم يكون سعرها واحد؛ لو نزلنا سوق الخضار النهاردة هنلاقي الطماطم بـ 15 جنيه والخيار 17 جنيه والبصل عدى الـ20 جنيه والبطاطس وصل سعرها أكتر من 15 جنيه؛ هل اللي بيحصل دة طبيعي؟ لا؛ مع أن حاجة زي البطاطس كميات كبيرة ومفيش ندرة”.

واوضح: “السجائر اللي عاملة أزمة والفاكهة وغيره؛ السجائر بتتباع بضعف سعرها العلبة اللي بـ 23 جنيه بتتباع بـ60 جنيه ليه؟.. دلوقت لازم يطلعوا يقولولنا ايه السبب؟ وايه الاجراء للي هيخدوه؟ ليه الازمة دي بقالها شهور ومحدش من المسؤولين بيسعى لحلها الأزمات بتخنق الناس في وقت مينفعش يكون في أزمة”.

وأكمل: “الأجهزة الكهربائية وغيره؛ أنتوا بتحولوا حياة الشعب إلى جحيم ولازم كل تاجر يتلم لان كل دول جزء من الأزمة؛ في ناس شرفاء ولكن في ناس معندهاش ضمير؛ في ناس مش حاسة بالشعب المصري وناس مبتدوقش كيلو اللحمة بالست شهور”.

واضاف مصطفى بكري: “بنقول ياجماعة إذا كان رئيس الدولة بيشتغل؛ مطلوب كل مسؤول يشتغل متقعدش تسيبلي السوق كدة لازم ننزل للناس وتتاخد إجراءات؛ وقلت قبل كدة اللي يرفع الأسعار لازم يتحاكم محاكمة عسكرية؛ الناس هتروح فين؟ الغلابة هتروح فين؟ أنا لسة راجع من الصعيد من كام يوم؛ كل حتة الناس تعبانة جدا الناس تحت خط الفقر”.